የሽረ እንደስላሴ አየር ማረፊያ የመንገደኞች በረራ ማስተናገድ ሊጀምር ነው ተባለ

0
131

በትግራይ ክልል በነበረው ውጊያ ምክንያት የመንገደኞች መጓጓዣ አገልግሎቱን አቋርጦ የነበረው የሽረ እንደስላሴ አየር ማረፊያ በረራዎችን ማስተናገድ ሊጀምር ነው። 

አየር ማረፊያው ስራውን የሚጀምረው ከረቡዕ ሰኔ 9፤ 2013 ጀምሮ እንደሆነ የኢትዮጵያ አየር መንገድ የኮርፖሬት ኮሚዩኒኬሽን ክፍል ነግሮኛል ሲል ኢትዮጵያ ኢንሳይደር ዘግቧል።

የሽረ እንደስላሴ አየር ማረፊያ ስራ አስኪያጅ አቶ ቢኒያም መስዑድ አየር ማረፊያው ስራ ለመጀመር በዝግጅት ላይ መሆኑን ነው የገለጹት፡፡

“አየር ማረፊያችን በቅርቡ ሥራ ስለሚጀምር ዝግጅት አድርጉ ተብለን በከፍተኛ ሁኔታ እየተንቀሳቀስን ነው የምንገኘው። ሆኖም ይሄነው የተባለ ቀን ግን እስካሁን ግልጽ አልተደረገልንም” ሲሉ ተናግረዋል አቶ ቢኒያም ። 

በኢትዮጵያ ኮንስትራክሽን ስራዎች ኮርፖሬሽን በ2007 ዓ.ም ግንባታው ተጀምሮ ከሁለት ዓመት በኋላ ወደ ስራ የገባው የሽረ እንደስላሴ አየር ማረፊያ በሳምንት 24 በረራዎችን ያስተናግድ ነበር።

ከሽሬ ከተማ በደቡብ አቅጣጫ የሚገኘው ይሄው አየር ማረፊያ፤ የኮቪድ ወረርሽኝ ከተከሰተ በኋላ በቀን የሚያስተናግዳቸው በረራዎች ከስድስት ወደ ሶስት እና ሁለት ዝቅ ብለው እንደነበር ስራ አስኪያጁ ያስረዳሉ። 

በትግራይ ክልል ውጊያ መቀስቀሱን ተከትሎ ሙሉ ለሙሉ ስራውን አቁሞ የነበረው አየር ማረፊያው፤ ከነገ በስቲያ ወደ ስራ ሲመለስ በየቀኑ በረራዎችን እንደማያስተናግድ በኢትዮጵያ አየር መንገድ የሚሰሩ ምንጮች ተናግረዋል፡፡

የኢትዮጵያ አየር መንገድ ያወጣውን የበረራ መርሃ ግብር የተመለከቱት ምንጮች፤ ወደ አየር ማረፊያው የሚደረጉት በረራዎች በሳምንት ሶስት ጊዜ ብቻ መሆናቸውን ጠቁመዋል። 

የሽረ እንደስላሴ አየር ማረፊያ ለበረራ ዝግ በነበረበት ወቅት ዘረፋ እንደተካሄደበት ነው የተገለጸው፡፡  ለጉዳዩ ቅርበት ያላቸው ምንጮች፤ ስራውን እንደገና ለመጀመር የሚያስችሉ ዕቃዎች ከባለፈው ሳምንት ጀምሮ ከመቐለ ከተማ ሲጓጓዙ እንደነበር አመልክተዋል።

አየር ማረፊያው ዘረፋ ተካሄዶበታል ቢባልም፤ በውጊያ ወቅት ውድመት እንዳልደረሰበት ስራ አስኪያጁም ሆነ የኢትዮጵያ ሲቪል አቪዬሽን መስሪያ ቤት ከፍተኛ ኃላፊ ይናገራሉ።  

የኢትዮጵያ ሲቪል አቪዬሽን ባለስልጣን ዋና ዳይሬክተር ኮሎኔል ወሰንየለህ ሁነኛው “በትግራይ ተከስቶ በነበረው የጸጥታ ሁኔታ የሽረ እና ሁመራ አየር ማረፊያ ጣቢያዎች ላይ ምንም አይነት ጉዳት አልደረሰባቸውም” ሲሉ ነው የተናገሩት። ሁለቱ አየር ማረፊያዎች ስራ ለመጀመር እና አገልግሎት ለመስጠት ዝግጁ መሆናቸውንም አረጋግጠዋል።

አውሎ ሚድያ ሰኔ 07/ 2013 ዓ.ም 

ወቅታዊ፣ትኩስ እና የተሟሉ መረጃዎችን ለማግኘት፡-

ቴሌግራም፦ https://t.me/awlomedia
ትዊተር፦ https://twitter.com/AwloMedia

ዩትዩብ፦ https://www.youtube.com/channel/UCFRuICCV8fHJGa3AbcA3zOA
ድረ ገጽ፦ https://awlomediatv.com
ፌስቡክ፡- https://www.facebook.com/awlomedia

መልስ አስቀምጥ

Please enter your comment!
እባክዎ ስምዎን እዚህ ያስገቡ